26 اكتوبر 2022
الملياردير الأمريكي ايلون ماسك يظهر بابتسامة عريضة كلها أمل وتفاؤل في المقر الرئيسي لتويتر بحوض حمام في إعلان رسمي عن اتمامه – مجبراً – صفقة الاستحواذ على موقع التواصل الاجتماعي بشكل كلي واخراج المنصة من البورصة ويعلن عن إقالة مجلس إدارة تويتر بالكامل.
في الحقيقة ده اطول مقال اشتغلت عليه مش عشان الموضوع صعب او مكنتش لاقي مصادر أو اي حاجة من دي، لكن عشان ايلون ماسك كان بيبهرني كل يوم بقرارته وأفكاره اللي عايز يطبقها في تويتر.
الموضوع بدأ في يناير 2022 لما ايلون ماسك اشترى 9% من أسهم شركة تويتر وبعدها تم دعوته انه يكون عضو في مجلس إدارة المنصة وكان متحمس للموضوع بس بعدها اعتذر وقال انه هيتابع من بعيد، لكن في شهر ابريل ماسك نزل تويتة انه عايز يشتري تويتر وعنده خطط لتطوير البلاتفورم، طبعاً محدش كان واخد الموضوع على محمل الجد وشايفينه بيهزي زي ما بيعمل عادة وإدارة توتير نفسهم مهتموش بالموضوع أوي لحد ما فعلا جالهم طلب رسمي من ماسك بشرا المنصة مقابل 44 مليار دولار، في الأول كانوا متشككين في كلامه وانه لسة بيهزر لحد ما المفاوضات أخدت خطوات جد وكان خلاص الصفقة بتتم بهدوء ولكن ماسك باين عليه كان بيهزر فعلاً وحب يتراجع عن الشرا بحجة ان في بوتات كتير موجودة على تويتر بتوصل لأكتر من 25% من حجم المستخدمين وانه تعرض للخداع من إدارة تويتر لما بلغوه أن عدد البوتات والحسابات الغير حقيقية ميزيدش عن 5% بس، وقام قالب الترابيزة وقالك لا يا عم يفتح الله مش شاري منكم حاجة، إدارة تويتر تسكت؟ قالولوه لا يا حبيبي هتشتري عافية يا إما هناخد منك تعويض كبير عشان بوظت سمعتنا في السوق وأرقامنا في البورصة انهارت وفعلا رفعوا عليه في ولاية ديلاور والمحكمة ادت لماسك مهلة لحد يوم 28 اكتوبر 2022 يا يكمل صفقة الاستحواذ يا اما هيكملوا في اجراءات المحاكمة، محامين ماسك كانوا شايفين ان موقفه في القضية ضعيف واحتمالية خسارته ليها اكبر من الفوز كمان القاضية المسئولة عن القضية حكمت لصالح تويتر في اكتر من قضية قبل كدة، الراجل قالك طالما كدة كدة خربانة فأنا هكمل صفقة الشرا واظبط الموقع على مزاجي.
ايلون ماسك شخصي نرجسي ومجنون من الدرجة الأولى ومن المعروف أنه شخص يميني من أنصار الحزب الجمهوري في أمريكا ودونالد ترامب، أول قرار اخده ماسك كان إقالة مجلس ادارة المنصة بداية من المدير التنفيذي باراج ارجاوال للمدير المالي لكل المجلس، وأعلن أن تويتر بيخسر كل يوم أكتر من 4 مليون دولار وهيكون في قرارات قاسية خلال الفترة الجاية لازم الكل يستحملها عشان الموقع يرجع يكسب ارباح تاني، تاني قرار لماسك كان الغاء العمل من المنزل لكل الموظفين الا بموافقة شخصية منه، وبعدها قراره بتسريح أكتر من 50% من الموظفين مع تهديد باقي الفريق أنك يا تشتغل أكتر من 12 ساعة كل يوم يا إما تقدر تستقيل من الشركة، هو عنده اعتقاد كبير ان الموظفين في تويتر متدلعين وناس كتير منهم لا تستحق التواجد في تويتر ده على الرغم ان موظفين كتير استقالوا وراحوا شركات تعتبر اكبر من تويتر زي جوجل وميتا.
ماسك شايف ان تويتر حالياً عبارة عن سفينة بحر مصدية وبتغرق وهو عايز يحولها لسفينة فضاء بتطلع القمر في ساعات والأهم من ده كله بتكسب فلوس وأرباح تقدر تعوضه عن الفلوس اللي اشتراها بيها المنصة، خصوصاً انه باع جزء من نصيبه في شركة تيسلا للعربيات الكهربائية يقدر ب13 مليار دولار مع مشاركة بنوك زي بنك امريكا وبي ان بي باريبا وغيرهم من البنوك الكبيرة تخش في تمويل الصفقة دي، فكر ماسك في زيادة ارباح تويتر كان من خلال نظرية شخلل عشان تعدي، هو دايماً شايف المشاهير والشركات لازم يدفعوا مقابل الامتيازات اللي بتتقدم لهم زي فكرة علامة التوثيق الزرقا المشهور بيها تويتر نزل قرار ان مقابل 8 دولار بس تقدر تخلي حسابك موثق، طبعاً في انتقادات كتير حصلت بسبب الموضوع ده لكن ولا فرق معاه في حاجة وفعل الموضوع لدرجة في حد عمل حساب موثق ومزيف باسم شركة ادوية امريكية وكتب ان الانسولين بقى متاح بالمجان في السوق وعمل خساير بالملايين للشركة دي عشان في ساعتها يقرر ماسك يوقف القرار المتسرع ده ويقول انه هيتم دراسة الموضوع بعناية أكبر قبل ما يرجع يتطبق تاني.
المشكلة الأكبر اللي بتواجه تويتر حالياً هو العشوائية الكبيرة في القرارات بجانب عدم وجود اي قيادات ومسؤولين عن مناصب هامة زي أمن المعلومات والخصوصية استقالوا من مناصبهم كمان قرر ماسك أنه هيرجع حساب دونالد ترامب تاني وهيوقف قسم محاربة الكراهية وشايفه قسم مش مهم خالص وبالمناسبة القسم ده اللي كان مسئول عن تقليل اي تغريدات أو حظر أي مستخدم بيحرض على طائفة او جنس او لون معين، وده خلى الدنيا في توتير بايظة خالص واللي عايز يقول حاجة بيعملها لدرجة ان في مواقع بتقول عدد التويتات اللي فيها كلام مسيء بقى 7 تغريدات من كل أكبر 20 تغريدة تفاعلاً في كل فئة وده تقريباً الضعف بعد قرار ماسك.
طبعاً في تفاصيل كتير وقرارات أكتر بتحصل كل شوية والمقال ممكن يطول اوي عشان اتكلم عنها ولكن زي ما قلت ماسك مقرر يخلي تويتر موقع بيجيب فلوس سواء ليه كمالك للمنصة أو حتى للمستخدمين من خلال انه يزود فكرة المحتوى الحصري زي الفيديوهات او الأصوات ويكون العائد فيه لصناع المحتوى أو الاشتراكات الشهرية وخلافه.
خطوة شراء ايلون ماسك لتويتر كانت مفاجأة لكل الناس بما فيهم ماسك نفسه ومن المعروف عن ماسك ادارته الثورية لشركاته، فهل فعلاً هيقدر ماسك يحقق كلامه عن تويتر2.0 الجديد؟ اللي بيكسب أرباح وفي نفس الوقت بيقدم مميزات كبيرة لمستخدميه تخليهم يقعدوا عليه أكتر فترة ممكن وكمان تدخله اعلانات أكتر – بعد تراجع ايرادات الاعلانات على تويتر في الفترة الأخيرة وده المصدر الرئيسي للأرباح – وده هدف أي موقع تواصل اجتماعي وانه كمان يكون متميز عن باقي مواقع التواصل المختلفة وده اتكلمت عنه قبل كدة هنا، طول ما الناس قاعدة على موقعي اكتر فده معناه اعلانات اكتر بتزود فلوس اكتر.
في الختام هل تتوقعوا ماسك هينجح في خطته ولا ال44 مليار دولار هيروحوا على الفاضي؟
