هل للسوشيال ميديا تأثير قوي فعلاً على نتيجة اي انتخابات ولا لا ؟
-بعد ثورة يناير ارتفع معدل مستخدمين الفيسبوك في مصر من 4.1 مليون مستخدم في يناير 2011 لـ8.55 في سبتمبر من نفس السنة بزيادة اكتر من 100% رقم مهول طبعاَ ودلوقتي الرقم بقى اضعاف اضعافه ، ثورة يناير في حد ذاتها كانت ثورة السوشيال ميديا اللي نشرت الثورة في كل المحافظات عن طريق ايفنت على الفيسبوك وهاشتاج #jan25 على تويتر، وده مش موضوعنا حالياًً.
-حكلم عن تجربتين واحدة حصلت والتانية لسة منتهية من ساعات ، الاولى هي انتخابات الرئاسة المصرية 2012، للاسف حاولت ادور على مصادر واحصائيات ليها تقريبا ملقتش اي حاجة تذكر، اغلب كلامي عنها حيبقى عن طريق تجربة شخصية مش احصائيات وارقام وففي مصادر ححطها في اخر المقال ، والتانية انتخابات أمريكا 2016.
مصر 2012 :
-عندنا نظريتين عكس بعض تماماً هنا ، النظرية الاولى بتقول ان السوشيال ميديا مالهاش تأثير خالص على اللي بيحصل في ارض الواقع بدليل نتيجة المرحلة الاولى بفوز محمد مرسي واحمد شفيق باكبر عدد من الاصوات ودخولهم المرحلة التانية والنهائية مع انه على السوشيال ميديا المنافسة كانت بين حمدين صباحي وابو الفتوح.
-دي صورة لواحد من اهم استطلاعات الرأي وقتها على صفحة “كلنا خالد سعيد” عن المرشحين : http://prntscr.com/cqxflx
-النظرية التانية : السوشيال ميديا السبب الرئيسي في نجاح محمد مرسي كان حملة عاصري الليمون على فيسبوك وتويتر اللي خلت عدد كبير من الشباب ينزل ينتخب مرسي لاسقاط شفيق.
– بعد بحث طويل لقيت تقرير اسمه ” بوصلة الناخب المصري” اكلم باستفاضة وبارقام واضحة عن تأثير السوشيال ميديا على المصريين في الفترة دي، التقرير ذكر انه اغلب اللي شاركوا في الاستفتاء بتاعهم كانوا من فئة اجتماعية واحدة زائد انهم كان عندهم قدرة للوصول للنت وده على عكس معظم شعبنا .
– للاسف برضه مصر بشكل عام صعب تحكم فيها على قدرة السوشيال ميديا في تغيير اي معادلات سياسية لان ده مرتبط بالفئة المؤثرة على الانتخابات ودول اغلبهم ملهمش اي علاقة بمواقع التواصل الاجتماعي او الانترنت اصلا، كل ده على الرغم من وصول عدد مستخدمين الانترنت في مصر ل33 مليون شخص حوالي 37% بس من الشعب.
-في الانتخابات الامريكية الاخيرة نقدر نطبق عليها نفس النظرية فشلت ولا نجحت ، دي صورة لمقدار التفاعل الناس مع بوستات هيلاري وعيلتها وترامب وعيلته خلال اخر 6 شهور :
http://prntscr.com/d501eg فيسبوك
http://prntscr.com/d501t5 تويتر
حنلاحظ ان ترامب
من بعد المناظرة الأولى وهو في النازل خالص وارتفاع أسهم هيلاري وقربت تعديه كمان لك لسبب لسة مدورتش فيه الصراحة ، ورغم حملات مشاهير هوليوود وضغط وسائل الاعلام الموالية للحزب الديمقراطي لتشجيع الناس على انتخاب هيلاري
انتصر ترامب بسبب كبار السن اللي اكترمن 50% منهم ادى أصواته لترامب ، والشباب اللي هو اكبر مستخدم للسوشيال ميديا اصواته كانت لهيلاري بس مكنش لهم التأثير الاكبر على الناس كبيرة السن.
– على النقيض برضه واحد زي اوباما
في 2008 كان وما زال أهم عوامل نجاحه السوشيال ميديا ، اللي عن طريقها قدر يوصل لاكبر عدد ممكن من الامريكان اللي وصلت اه في اكتر من 13 مليون شخص مشتركين في الEmail List وقدر يجمع 3 مليون دولار من 6.5 مليون متبرع عن طريق الانترنت، عامة حملة اوباما دي عايزة مجلدات لوحدها لانها تقريبا انجح كامبين كان لها تأثير فعلي على ارض الواقع في حياتي.
-الاكيد ان الموضوع مش متوقف على نظرية تأثير السوشيال ميديا بس على الناس، السوشيال ميديا في المستقبل القريب حتبقى فعلاَ المسيطرة بشكل كامل على عقول وتصرفات الناس لان الجيل الحالي بتاعنا هو اللي حيتقال عليه كبار السن وحيتطبع بمجريات عصره ، الناس الكبيرة اللي كانت مؤثرة في انتخابات مصر 2012 وامريكا 2016 اتأثروا بكلام التلفزيون والجرايد وبالشعارات الرنانة اللي كانت بتتقال من المرشحين.
-ويبقى السؤال هل فعلاً للسوشيال ميديا تاثير على اي انتخابات (كبيرة) بتتعمل في العالم ولا لا؟، لو الاجابة نعم ايه هي النماذج اللي شفتها ؟
*تقرير عن الاعلام في مصر حتى سنة 2013 : https://osf.to/2cW1eKA
**احصائية عدد مستخدمي الانترنت وفيسبوك في مصر لحد نوفمبر 2015: http://bit.ly/2cZ89iw
***تقرير بوصلة الناخب المصري : http://bit.ly/2dxCMjn
****احصائية هيلاري وترامب مفصلة من هنا : http://bit.ly/2dnSoUJ
*****حملة اوباما للانتخابات الرئاسية 2008: http://bit.ly/2fC0wE6
تحديث:
