بمناسبة #اليوم_العالمي_للغة_العربية امبارح، قلت أقعد أدور على شوية مصادر وتقارير حوالين اللغة العربية في مواقع التواصل الإجتماعي وأغلبهم للأسف من 2014.

دورت كتير جداً ومطلعتش غير بمصدر واحد يتيم من كلية محمد بن راشد  أسمه The Arab Social Media Report 7th Edition.

التقرير مكون من 88 صفحة وفيه تفاصيل كتير جداً ومعلومات أكتر بس أنا هاخد منه جزء بسيط، مشكلتي أن أرقامه أخرها كان فبراير 2017 بس أحسن من مفيش.

المهم يعني التقرير بيقول أن:

55% من المحتوى اللي بينزل على مواقع التواصل بيكون باللغة العربية وده لأول مرة يحصل بزيادة 13% عن السنتين اللي فاتوا.

95% من اليمنيين بيستخدموا النسخة العربية من فيسبوك و 94% من المصريين وأقل دولة هي الصومال بنسبة 22% بس.

المفاجئ بالنسبة لي أن أكتر نسبة زيادة استخدام للعربي كان في دول شمال أفريقيا مع قلة استخدامه في دول الخليج مجتمعة، بمعنى تاني دول شمال أفريقيا اللي بيتقال عليهم مبيعرفوش يتكلموا عربي وثقافتهم فرنسية بقوا يستخدموا العربي أكتر من الدول اللي منها طلعت اللغة، وده بيدل بشكل عام على تغيير في الهوية والأفكار بشكل كبير.

16% معدل النقصان في استخدام العربي بعمان كصاحبة أعلى معدل وراها قطر ب6% ثم البحرين ب5.3%.

64% من مستخدمين مواقع التواصل شباب تحت سن ال30، يعني لو حتى بتستهدف كبار لازم هتوصلهم من خلال ولادهم، واللغة اللي بتخاطبهم بيها لازم تختارها بعناية.

156 مليون هو عدد مستخدمين فيسبوك من الوطن العربي حتى فبراير 2017، والسنة اللي قبلها كان 115 مليون يعني حصل زيادة 41 مليون مستخدم في سنة واحدة بس، وعدد الحسابات العربية على فيسبوك زاد لأكتر من الضعف في آخر 3 سنين.

14 مليون هو عدد المستخدمين الجدد لفيسبوك من مصر لوحدها آخر سنتين ووراها جت الجزائر ب9.4 مليون والعراق ب7.2 مليون.

1 من كل 3 في الوطن العربي عنده حساب على فيسبوك و1 من كل 5 بستخدمه يومياً.

23% هو حصة مصر لوحدها من مستخدمي الفيسبوك في الوطن العربي بعدها السعودية بعدها الجزائر.

قطر صاحبة أعلى عدد مستخدمين يومياً لفيسبوك بعدها الإمارات وتليهم تونس، مع الوضع في الإعتبار أن المستخدمين مش شرط يكونوا قطريين معظمهم غالباً أجانب.

30 مليون عدد زيادة مستخدمين فيسبوك بمصر من يناير 2011 حتى نفس الفترة من 2017.

نيجي على تويتر اللي فيه عدد المستخدمين العرب 11.1 مليون شخص بزيادة تقريبا تزيد عن 40% خلال آخر 3 سنين.

29% من مستخدمين تويتر العرب موجودين في السعودية رغم أنها نسبة كبيرة بس قلت من 40% قبل كدة، في المركز التاني مصر ب18% ثم الجزائر والإمارات ب9% لكل دولة.

27.4 مليون تغريدة يومياً بيكتبها العرب بعد ما كانت من سنتين 17.2 مليون.

السعودية ومصر على الترتيب أكتر دولتين متفاعلتين على تويتر بنسبة 33% من نسبة التغريدات و20% لمصر.

وهختم التقرير بانستجرام اللي فيه 7.1 مليون مستخدم عربي منهم 2.1 مليون في السعودية لوحدها و1.2 مليون في الإمارات و800 ألف في مصر- أعتقد إن حصل زيادة كبيرة لأن التقرير ده من أكتوبر 2016-.

36.8% بس من مستخدمي انستجرام في الوطن العربي عاملين التطبيق باللغة العربي في حين أن 55.1 %منهم بيستخدموا الانجليزي.

التقرير ممتع جداً وفيه حاجات أكتر بكتير من اللي ذكرتها ولو أنت قاعد فاضي كدة وعايز تعرف هتستهدف الوطن العربي إزاي وبأنه طريقة وموقع تواصل التقرير ده حيحطك على أول الطريق.

إحنا لغتنا حلوة أوي يا أخوانا اكتبوا عربي وساهموا أن الناس تتعود على الكتابة بيها، لغتنا قوية وفيها معاني ومرادفات وجماليات مش متوفرة في أي لغة تانية، عرفوا الناس أساسيات اللغة من غير تريقة علشان يعرفوا يكتبوا صح، ساهموا أن المحتوى العربي يكون أقوى من كدة على الإنترنت لأن في عجز واضح عندنا في أغلب المجالات ومعظم المصادر أجنبية، والعجيب أن اللغة الفارسية عندها محتوى عظيم على الإنترنت وميجوش نص عددنا.

وفي الختام: “إِنَّ الَّذي مَلَأَ اللُغاتِ مَحاسِنًا *** جَعَلَ الجَمالَ وَسَرَّهُ في الضادِ”

أحمد شوقي

**إذا أعجبك المقال من فضلك أضغط على زر مشاركة