ليه بايبال هيشتري بينتريست ب39 مليار دولار؟

 في خبر غريب جداً ظهر علينا ان منصة الدفع الإلكترونية الأشهر في العالم بايبال عايزة تستحوذ على منصة الصور الاجتماعية بينتريست، مستغرب مش كدة؟ ايه اللي جاب القلعة جنب البحر؟ ليه بايبال يفكروا في حاجة مش بتاعتهم وليه بينتريست عندهم موافقة مبدأية أصلا على فكرة زي دي رغم رفضهم قبل كدة عروض استحواذ كتير قبل كدة أشهرهم من جوجل وميكروسوفت؟

علشان نعرف إجابة الأسئلة المحيرة دي هنتعقب كام تحديث عملهم بينترست خلال 2020 و2021 وكمان خريطة استحواذات بايبال على الشركات في نفس الفترة.

مع بداية انتشار فيروس كورونا في 2020 وقعاد ناس كتير في بيوتها ومواقع السوشيال ميديا بقى عليها استخدام مكثف بطريقة مهولة وكمان انتشار الرهيب لثقافة الشراء عبر الإنترنت المشهور حالياً بال Ecommerce. من المعروف عن بينتريست أنه موقع حبيب الكل هتلاقي عدد المستخدمين فيه بيزيد على ال3 نواحي الكبار والشباب والمراهقين، نادراً لما تلاقي حد يقولك لا مبحبوش البتاع ده او مش بيجي معايا سكة وخلافه على العكس هو يعتبر الموقع الرسمي لو بتدور على منتجات او أفكار منتجات تشتريها.

المهم النقلة الكبيرة اللي حصلت لبينتيرست لما زودوا خاصية الShop بحيث تقدر كصاحب بيزنس تربط موقعك بحسابك وتحط المنتجات وأول ما عميل يعجب بمنتج يتحول على صفحة المنتج على موقعك ويشتري على طول شبه خاصية الشوب الموجودة في فيسبوك وانستجرام بالظبط، وده خلى معدل الناس اللي بتشتري من خلال بينترست ب50٪ في أمريكا، وبشكل عام 85٪ من مستخدمي البلاتفورم اشترت منتجات بسبب أنها شافتها على بينترست، رقم ضخم ويخض كمان لما تعرف ان عدد مستخدمي المنصة بشكل شهري 450 مليون مستخدم.

– نصيحة على الهامش: لو عايز توسع دايرة الشرا لمنتجاتك برة الشرق الأوسط لازم تستخدمه وأزيدك من الشعر بيت تكلفة إعلانات التحويل اللي هي ببساطة تخلي الناس من متابع لمشتري لمنتجاتك ارخص ب2.3 من باقي مواقع السوشيال ميديا.

كل ده جميل وعرفنا أهمية بينترست في التجارة الإلكترونية برضه إيه علاقة ده ببايبال؟

لو جينا بصينا لأهم 3 استحوذات لبايبال خلال آخر 3 سنين هنلاقيهم على الترتيب:

1- Honey ودي إضافة على جوجل كروم بتجيبلك أكواد الخصومات والكوبونات من موقع الشرا أونلاين ب4 مليار دولار أيوة اشتروا Extention ب4 مليار .

2- GoPay منصة دفع إلكتروني صينية وبايبال أول شركة غير صينية تمتلك 100٪ من منصة دفع داخل الصين.

3- Paidy منصة التقسيط اليابانية ب2 مليار دولار .

معنى عمليات الاستحواذات دي اهتمام بايبال الكبير بفكرة السوبر ابليكشن  لتسهيل عملية الشرا لمستخدمين الموقع وكمان اهتمامهم الكبير بالسوق الآسيوي الاستهلاكي الضخم. أما مصطلح السوبر ابلكيشن فده ببساطة انك كمستخدم للتطبيق بتاعي تقدر تعمل كل حاجة من خلاله تشتري أو تبيع أو تدفع فواتير وتطلب أكل وتطلب مواصلات وتقسط من الاخر كل حاجة وأي حاجة بتبقى من خلاله، وأشهر التطبيقات السوبر تطبيق WeChat الصيني اللي بدأ كمنافس لواتساب ودلوقتي بقى في حتة تانية خالص، وفي كمان تطبيق Paytm الهندي ومؤخراً في مصر بدأ تطبيق حالاً يحط نفسه كأول سوبر ابليكشن في مصر  وبيسعى فيسبوك بخطوات بطيئة يحول واتساب لسوبر ابلكيشن بس المصايب اللي بتحصل لهم مأخرة الخطوة دي جداً.

لو جيتوا لاحظتوا تطبيقات السوبر فكلها تقريباً موجودة في آسيا ومش متواجد حاجة زي كدة في أمريكا وأوروبا وأعتقد ده الخطوة المستقبلية الأساسية اللي عايز يعملها بايبال من شرا بينتريست، بايبال عندهم ميزة قوية جداً هو استقلالية الشركات المستحوذين عليهم فممكن متحسش او متعرفش أصلا ان الشركة دي تبع بايبال وده على عكس فيسبوك تماماً اللي رابط كل خدماته في حاجة واحدة.

توقعي الشخصي ان بايبال حابين يضربوا عصفورين بحجر واحد، الأول الدخول لعالم مواقع التواصل الاجتماعي وهيكون من الباب الكبير خصوصاً ان بينترست بيحقق أرباح سنوية من الإعلانات تقريباً 1 مليار دولار، التاني الدخول بشكل مباشر في التجارة الإلكترونية من خلال انه يحول بينترست مع الوقت لمنصة تجارة إلكترونية بشكل مباشر مش مجرد إلهام للشرا ومع الوقت تتحول لحلم السوبر ابلكيشن.

ممكن تعرف أكتر كل موقع تواصل اجتماعي بيوصل للمستخدمين ليه هما بيستخدموه في مقالة قديمة كتبتها من هنا.

قبل الختام ممكن يكون اللي بقوله ده أي كلام في أي حتة بس من وجهة نظري مش بعيدة. أخيراً هل فعلاً قررت تشتري منتج او خدمة معينة بعد ما شوفتها على بينترست قبل كدة ولا لا؟

#سوشيال_مينيا المصادر في أول كومنت

: خبر شرا بايبال لبينتيرست https://techcrunch.com/2021/10/20/paypal-said-to-be-exploring-potential-acquisition-of-pinterest/

تقرير كامل عن أرقام بينتريست زي الإعلانات وارباحها ونتايج الإعلانات https://view.highspot.com/viewer/5f0e1aa4c714337c761eab84 ا

استحواذات بايبال: https://newsroom.paypal-corp.com/news-financial