النهاردة هتكلم معاكم عن تقرير فيسبوك بخصوص شهر رمضان المبارك وعيد الفطر وبعتبره واحد من أهم التقارير اللي ممكن تاخدها كمرجع ليك عشان تفهم سلوك مستخدمين مواقع التواصل الإجتماعي في مصر خلال شهر رمضان وتحديداً موقف فيسبوك وإزاي عدى رمضان وعيد الفطر 1441 هجرية – 2020 ميلادية أو عام انتشار جائحة كورنا – كوفيد 19- على الناس واستخدموا السوشيال ميديا ازاي عشان تقدر تعمل خطة التسويق لشهر رمضان وعيد الفطر على أساس سليم وبأرقام واضحة.

نتايج التقرير جت من خلال عمل استبيان في 11 دولة من أكبر الدول الإسلامية أواللي فيها عدد مسلمين كتير وهم ( مصر – فرنسا – ألمانيا –  إندونيسيا – ماليزيا – نيجيريا – باكستان – السعودية – تركيا – بريطانيا – الإمارات ) من حيث استخدام فيسبوك.

الاستبيان اتعمل على اكتر من 1500 شخص من كل بلد من حيث تأثير فيروس كورونا عليهم وطبيعة استخدامهم لوسائل الإعلام ومواقع التواصل الاجتماعي وكمان سلوكيات الشراء وتأثير الأنلفونسرز على قرارتهم الشرائية وهكذا.

التقرير مفيد ليك كمسوق الكتروني أو صاحب بيزنس بتجهز لاستراتيجية وخطة التسويق خلال شهر رمضان وعيد الفطر أو خلاص عملت الخطة وعايز تتأكد أنك ماشي بشكل صح، أو حتى شخص عنده حب استطلاع للنتايج والأرقام.

في كام نقطة في التقرير لفتت نظري وحابب أذكرها هنا وأعلق عليها:

1- بيع لرمضان قبل رمضان.

يعني أيه الكلام ده؟
في 30% من الناس بتجهز أنها تشتري لمنتجات رمضان قبل الشهر المبارك بحوالي أسبوعين ل10 أيام ، و24% قبل رمضان بأيام قليلة فبالتالي أنت لازم تبقى جاهز بحملتك التسويقية اللي ليها علاقة برمضان من دلوقتي علشان لحد ما الناس تاخد قرار الشراء منك أو من غيرك الموضوع بياخد شوية وقت بيخلي 17% من الناس بتبدأ تشتري خلال نص رمضان، ده غير أن 42% من المستخدمين قالوأ انهم أشتروا منتجات أكتر في رمضان 2020 وده شيء متوقع مع زيادة اعتماد الناس على الشراء أونلاين لكن المفاجأة بالنسبة لي أن نسبة الرجالة اللي أشترت كانت أكتر من الستات، الرجالة أشتروا بنسبة 43% أكتر في حين الستات كانت نسبتهم 39% بس، ورغم أن ممكن تكون سنة 2020 سنة استثنائية في موضوع الشراء خلال شهر رمضان اللي بيكون متعارف بفترة ركود كن من وجهة نظري أن فرصتك تبيع منتجات أكتر في رمضان مع ربطها بعروض، وبأكد تاني على بيع منتجات مش خدمات لأن الخدمات أكتر حاجة شغلها واقع في رمضان.

2-المستقبل للسوشيال.

70% من الناس قالت أنهم بيستخدموا عيلة فيسبوك ( فيسبوك – ماسنجر – انستجرام – واتساب) في إرسال التهاني والمباركات للناس في رمضان، عشان كدة ممكن لو عايز تزود تفاعل الناس مع حساباتك أنك تعمل تصميمات للتهنئة يقدروا يستخدموها بينهم وبين بعض لان كمان حصل 66% زيادة في استخدام للتكنولوجيا للتواصل مع الأهل والصحاب خلال رمضان والعيد اللي فاتوا وده شيء طبيعي خصوصاً مع صعوبة عمل العزومات والإفطار الجماعي اللي متعودين عليه وكمان وجود حظر التجول، فالناس بدأت تلجأ للسوشيال ميديا والفيديو كول عشان يبقى في سهولة للتواصل لأن في حوالي 40% في الاستبيان قالوا ان زياراتهم لأهلهم كانت أقل من أي وقت تاني، دي فرصة كبيرة لأي بلاتفورم عايزة توصل الناس ببعضها بسهولة وكمان فكرتها تكون بسيطة والأهم تكون تركيزها على الناس كبيرة اللي بيكون عندهم صعوبة في استخدام التطبيقات ويخلوا الأبلكيشن معتمد على الأوامر الصوتية جوة الأبلكيشن نفسه .

3- اختار الوقت المناسب للنشر

35% بيقضوا وقتهم في رمضان يدوروا فيه على النت على الحاجات اللي عايزين يشتروها فأنت لازم تبقى مختار الوقت المناسب عشان تعمل إعلانات أو تنزل بوستات، ودايماً أبعد عن فترة من الساعة 12 الضهر لحد الساعة 4 العصر لأانها أكتر فترة الناس بتبقى يا إما بتعمل الأكل فيها أو مريحة ونايمة، 41% نسبة سيطرة الموبايل على  وقت الناس خلال شهر رمضان ودي نسبة طبيعية خصوصاً لما تعرف – حسب تقرير We Are Social – أن 91% من مستخدمي الانترنت المصريين بيخشوا بستخدموه من خلال الموبايل وده تقريباً حوالي 50 مليون مصري، فأنت محتاج لو عندك موقع E-Commerce من الأساسيات بتاعته أنه يكون سهل الاستخدام على الموبايل ودي حاجة لازم وضروري وحتماً ولابد تبقى منسقها مع الشركة أو الشخص الDeveloper اللي بيعملك الويبسايت أو شغال عليه.

4- المجد للفيديو

تعرف أن في 64% من المستخدمين بيشوفوا الفيديوهات في رمضان عشان يتفرجوا على وجبات جديدة يقدروا يعملوها على الفطار أو أفكار لهدايا ينفذوها ويقدموها في العيد، فأنت لازم تعتمد على محتوى الفيديوهات التعليمي في رمضان فلو أنت مثلاً محل بقالة أو حلويات كبير ممكن تعمل فيديوهات لأفكار عمل حلويات أو منتجات سريعة بعد الفطار وأكيد هتستغرب إزاي انا بتاع حلويات وهقول للناس أعملوا أنتم في بيتكم هقول دول على الValue وأن العميل هيبص لك بنظرة مختلفة تماماً هتخليه بيثق فيك كبراند بشكل كبير أوي ويشتري من عندك الحلويات والمنتجات أسهل، المستخدمين لما أتسألوا أيه أكتر حاجة نوع محتوى حابب تشوفه من أي بيزنس 43% قالوا نشوف محتوى حقيقي وصريح يقدروا يستفيدوا منه وهنا يجي دور الستوريز اللي دورها بقى أساسي في شغلك مش شيء جانبي ممكن تلجأ ليه أو لا، لازم كل يوم على الأقل ستوري أو اتنين لحاجات من شغلك.

5- تأثير الانفلونسرز مهم

شأنا أم أبينا الانفلونسرز بقوا مهمين جداً في الترويج لأي بيزنس وعشان كدة حوالي 47% من الناس شايفة أن رأي الانفلونسر في منتج أو خدمة ما بيكون ليها تأثير كبير على قرار شرائها للمنتج ده، علشان كدة لازم في خطة التسويق لشهر رمضان تحط الانفلونسرز وجروبات الريفيوهات في حساباتك خصوصاً لو أنت مطعم أو بتبيع منتجات للأكل ونصيحة على السريع متهتمش بعدد الفولورز للانفلونسر شوف نسبة التفاعل عنده قد أيه وكمان هل هو واحد بتاع سبوبة وأي حاجة بيقول عليها حلوة وجميلة وبسمسم ولا بيخاف على سمعته وعلى الريفيو اللي بيقوله لمتابعينه، كمان لو قدرت تشوف الماكرو انفلونسرز – ناس عندها عدد فولورز من 1000 لحد 10 الاف – ومش بتاخد فلوس فده هيبقى شيء كويس ليك، وجروبات ريفيوهات الأكل مهمة برضه لازم تشوف أسعارهم وتحاول تتعاون معاهم بس ميبقوش هما تركيزك الأول عشان تكلفتهم بقت كبيرة.

6- التبرعات الاجتماعية تكسب

48% من المستخدمين زودوا تبرعاتهم في رمضان 2020 وده بسبب احساسهم بمد تأثير الكورونا الصعب على الوظايف والاعمال وناس كتير فقدت شغلها خلال الفترة اللي فاتت وفعلاً في أشد الحاجة للمساعدة، ورغم ان المتعارف عليه في رمضان هو شهر الخير والتبرعات لكن  النتايج دي مؤشر قوي لكل الجمعيات الخيرية اللي ليها علاقة بتوفير فرص عمل أو حل مشكلات اجتماعية أنهم يزودوا الدعاية أكتر في رمضان، وشكل الدعاية ده مش لازم يبقى صرف بالملايين سواء في السوشيال ميديا أو التلفزيون ولكن من خلال الاستعانة بالمؤثرين والمشاهير زي حملة رسالة في 2020 #تحدي_الخير اللي كان سبب كبير في التخفيف عن معاناة ناس كتير وشارك في لاعبي كورة وممثلين ومغنيين وغيرهم كتير.

7- اللوكال يكسب

الناس كلها بتحب تشتري من براندات ده أكيد لكن في نفس الوقت 39% منهم بيحب يشجع الشركات والأماكن الصغيرة اللي حواليه وكمان يكتب عنهم كلام كويس على السوشيال ميديا، فدايماً حاول تخلي العملاء اللي أشتروا منتجاتك يعملوا ريفيو عن منتجك أو صفحتك ومتكتفيش انك تشكرهم بل على العكس أعملهم أوفر أو تخفيض لأي عملية شراء مستقبلية.

8- نصيحة أكسترا دبل

خطوة زيادة في البوست ده  فيروز القط كانت كاتبة شوية نصايح رائعة عن إزاي تدير حسابك أو حسابات العملاء اللي معاك في رمضان أنصحكم تقروه وتطبقوه هيفرق معاكم كتير، ومتنساش دي نصيحتي إزاي تستغل تيليجرام في البيزنس بتاعك وفي شهر رمضان الناس بتحب تتسلى وتمسك موبايلتها كتير فجرب تعمل مسابقات والجوايز تخفيضات أو هدايا مجانية.

لو عايز تعرف تفاصيل اكتر عن تقرير فيسبوك لشهر رمضان لينك التقرير بشكل كامل من هنا.

أخيراً بعد ما عرفت كل المعلومات دي عن سلوك المستخدمين، هل بدأت في خطة تسويق لشهر رمضان وعيد الفطر للعملاء اللي شغال معاهم أو حتى البيزنس بتاعك ولا لسة؟ وهل شايف التقرير هيفرق معاك في الاستراتيجية اللي حتعلمها ولا لا؟