عمرك سألت نفسك هو إزاي البوستات بتظهرلي على انستجرام؟ ليه البوست ده بالذات يظهرلي وده لا؟ ساعات بتلاقي بوستات بقالها يومين ولسة واصلالك النهاردة؟

كل دي أسئلة أكيد كلنا سألناها لنفسنا قبل كدة ومكنش عندنا أي تفسير ليها وده لأن انستجرام من ساعة ما غير طريقة ظهور البوستات في 2016 ومأعلنش بشكل واضح عن أسباب ظهور البوستات لحد ما أعلنوا أخيراً عن خوارزمية انستجرام الجديدة في يونيو 2021.

ثواني بقى كدة أكيد بتسأل هي أيه الخوارزمية دي أصلا؟

ببساطة شديدة الخوارزمية أو Algorithm والاسم مقتبس من العالم الشهير وأحد مؤسسي علم الجبر محمد بن موسى الخوارزمي، الخوارزميات دي عبارة عن مجموعة من المعاملات والأوامر اللي بيتم استخدامها عشان تحدد ايه اللي يظهر على الFeed عندك وده بيكون عن طريق مجموعة من التعليمات والشروط بيتقال عليها Signals – اشارات حاطتها الموقع او الابلكيشن اللي بتستخدمه.

كل منصات ومواقع التواصل الاجتماعي اللي بنستخدمها زي فيسبوك وانستجرام وتويتر ولينكدإن وتيك توك وغيرهم بيعملوا الخوارزمية الخاصة بيهم كل موقع حسب أهدافه ونوع المحتوى اللي في، فمثلاً تويتر أهم حاجة في الخوارزمية عنده هي التوقيت أو بمعنى أدق (المحتوى الأحدث يظهر الأول)، على عكس فيسبوك اللي بيهتم في خوارزميته – هنتكلم عنها في بوست منفصل – باهتمامات المستخدم وتفاعلاته مع البوستات اللي بيشوفها.

المهم نرجع لانستجرام اللي أخيراً أعلنوا في 8 يونيو 2021 عن الخوارزمية بتاعتهم اللي طلعت 3 مش واحدة بس وهتكلم عن كل واحدة بشكل مفصل ومتقسمة كالآتي:

•  خوارزمية للFeed 
•  خوارزمية للExplore 
•  خوارزمية للReels
  

  أولاً: خوارزمية الFeed

خلينا نبدأ الأول بأول شكل لخوارزمية انستجرام لما ظهر الأبلكيشن للنور في 2010  كان اسمها Chronological – مرتب زمنياً بمعنى أنها شبه تويتر الأولية للبوستات الأحدث ومع زيادة عدد مستخدمي انستجرام وبالتالي زيادة المحتوى المعروض لقوا أن أكتر من 70% من بوستات الناس اللي بتابعهم بتروح عليك ومش بتظهرلك فبدأوا يعملوا خوارزمية جديدة اسمها Best Posts First الهدف منها أنها تخلي أحسن البوستات تظهرلك من خلال اهتمامتك المشتركة، شكل الخوارزمية دي أو الSignals المعتمدة عليها مكنش حد يعرفها ولا كان انستجرام موضحينها لحد ما حصلت فضيحة أناليتكا الشهيرة وكانت سبب في انهيارثقة فيسبوك في العالم كله وملخصها تم التجسس على حسابات 5 ملايين أمريكي والتلاعب في المعلومات اللي بتظهرلهم على فيسبوك وفي فيلم تسجيلي من جزئين حلو جداُ اتكلم عن الموضوع ده بالتفصيل اسمه Agents of Chaos أرشحه للمشاهدة، المهم بعدها فيسبوك بقوا مضطرين يوضحوا ايه الخوارزمية اللي شغالين فيها على المواقع والمنصات اللي بيمتلوكها وواحد منهم كان انستجرام  وأهم 6 سيجنالز بيتحسب بيها ترتيب البوستات:

• الاهتمامات: انستجرام بيتوقع ايه البوستات اللي ممكن تهتم بيها بناء على تفاعلاتك السابقة.
• التوقيت: البوست لو نزل في وقت حديث يعني النهاردة أو بكرة يبقى ليها أولوية عن بوست نزل من 5 أو 6 أيام.
• العلاقة: علاقتك أيه بصاحب البوست وهل بتتفاعل على بوستاته بشكل مستمر زي انك تعمل لايك او كومنت او تعمل تاج ليه في بوست أو صورة.
• التردد: كام مرة بتخش على انستجرام على مدار اليوم وعلى أساسها بيعرضوا عليك أحسن البوستات من اخر مرة دخلت الأبلكيشن.
• المتابعون: لو انت بتابع ناس كتير فده هيقلل فرص أن يظهرلك أكتر من بوست لنفس الشخص.
• الاستخدام: معدل استخدامك للأبلكيشن، هل بتقعد وقت طويل تتفرج وتتفاعل على البوستات ولا بتقعد فترات قصيرة تشوف أهم البوستات اللي بتظهر قصادك وبس.

دي أهم المعلومات اللي أعلنوا عنها في 2018 وفي تحديث انستجرام الجديد السنة دي 2021 قالوا أن في 4 حاجات رئيسية معتمدين عليها في ظهور البوستات:

• معلومات عن البوست: هل البوست ده منتشر وعليه تفاعلات كتير، وكمان حاجات تانية زي نوعه صورة ولا فيديو ونزل امتى واللوكيشن اللي نزل منه البوست.
• معلومات عن الشخص اللي نزل البوست: كام مرة المستخدمين اتفاعلوا مع بوستات وستوريز الشخص ده خلال الأسابيع الأخيرة على انستجرام.
• نشاطك على التطبيق: الحاجات اللي عملت ليها لايك أو عملت كومنتات وهكذا.
• تاريخ تفاعلك مع شخص محدد: دي بيشوفوا مقدار تفاعلك مع شخص معينة خلال استخدامك انستجرام هل مجرد بتعمل لايك للبوستات ولا بتعمل كومنتات كمان، فكل ما تفاعلك معاه اكبر وفيه كومنتات أكتر فرصته عشان يظهرلك بوستاته هيبقى أكبر.

في تكلمة لمقال أدم ميسوري قال نقطة مهمة جداً أن نقطة إعادة النشر – Reshare للستوريز كانوا بيدوا ليها وزن أقل بكتير وبيقللوا من ظهورها للناس وبالفعل في ناس وأنا منهم مكنش متاح أصلاً أني أعمل شير لبوستات الFeedعلى الستوريز لحد وقت قريب أو حتى أعمل Repost للستوريز نفسها، لكن انستجرام لقوا أن على عكس تصوراتهم الناس بتبقى مهتمة تعمل شير لأحداث مهم زي كأس العالم أو مشكلة جورج فلويد ومستجدات فيرس كورونا وغيرهم كتير على الستوريز.

ثانياً: خوارزمية الExplore

زي ما اتكلمنا في شرح الFeed والStories فالهدف منهم بشكل رئيسي أنك تتابع أصحابك وقرايبك لكن الExplore حسب وصف انستجرام فهما عاملينها مخصوص عشان تشوف وتتفرج على محتوى جديد هما بيقترحوه عليك من خلال اهتمامتك وتفاعتلك السابقة، حد هيقولي ما هو كدة كدة شبه الفيد هقولك اصبر هشرحها بمثال:

لو أنت دلوقتي بتابع اكاونت الشركة SpectrickDMA@ وعملت لايك على بوست فساعتها انستجرام بيبدأ يشوف مين تاني عامل لايك على البوست ده وأيه الأكاونتات التانية اللي هو بيتابعها وبيتفاعل معاها فلو الناس دي بتتفاعل مع اكاونتات تانية وليكن أكاونت نادي الزمالك @ZamalekSC فكدة انستجرام بيبدي يرشحلك في الاكسبلور بوستات من اكاونت الزمالك كتوقع ان الحاجات دي ممكن تبقى من ضمن اهتمامتك بغض النظر عن نوع المحتوى او أيه تفاصيله.
وترتيب بوستات الاكسبلور بيبقى بناء على توقعات انستجرام لدرجة اهتمامك بكل بوست وانستجرام بيكملوا شرح أن توقعاتهم دي بتكون من خلال سؤال بسيط” لو شوفت البوست قدامك هتتفاعل معاه إزاي؟” يعني هتعمل لايك ولا شير ولا ايه بالظبط من خلال إجابة السؤال ده هتترتب البوستات وأهم 3 انواع تفاعلات بيعتمد عليها في الترتيب ( لايك – شير – حفظ البوست Save).
ونفس ال4 حاجات رئيسية اللي كتبتهم في الFeed هما برضه بيعتمدوا عليها هنا لكن مع اختلاف  الترتيب حسب الأهمية:

• معلومات عن البوست
• تاريخ تفاعلك مع الحساب اللي نزل البوست
• نشاطك على التطبيق
• معلومات عن الشخص اللي نزل البوست

في نقطة على الهامش برضه اتقالت أنك لو شوفت بوست مؤذي أو هجومي في الFeed فانستجرام تدخله هنا مش هيبقى قوي لأن من وجهة نظرهم ده مكان بتشوف فيه حاجات بينك وبين صحابك ولكن لو نفس البوست ده ظهرلك على الExplore فساعتها الموضوع مختلف فمش أي نوع محتوى ممكن تلاقيه على الاكسبلور خصوصاً لو حاجات ليها علاقة بالتدخين زي السجاير والفيب.

ثالثاً: خوارزمية الReels

 بالنسبة لي الريلز هي أهم حاجة شكل محتوى موجود على انستجرام حالياً وده لأنه سهل وبسيط وسريع ومسلي بتتفرج على فيديوهات كتير حلوة وأنت ماشي في سكتك من ناس متعرفهاش وانستجرام قالوها صراحة كدة ” أحنا صممنا الريلز عشان نرفه عنك” وأنهم لما سألوا الناس من خلال الفيدباك تحبوا تشوفوا محتوى مضحك ولا ترفيهي فالاختيار كان الترفيهي واتقال أهم نقطة بالنسبة لي في الحتة دي الاهتمام بصناع المحتوى الصغار.

وأهم 4 حاجات رئيسية في خوارزمية الReels نفسها الموجودة في الExplore والFeed لكن برضه مع اختلاف الترتيب حسب الأهمية:

• نشاطك على الريلز: أيه الحاجات اللي عملت عليها لايك أو كومنت أو شير في الريلز
• تاريخ تفاعلك مع الحساب اللي نزل الريل: لو تفاعلت مع اي فيديو نزله قبل كدة فده هيديه أولوية فيديوهاته تظهر عندك تاني
• معلومات عن الريل: محتوى الفيديو نفسه من خلال عمل تحليل لكل فريمات الفيديو فيقدروا يعرفوا ده بوست عن الكورة الاجنبية ولا المصرية ولا عن أيه بالظبط وكمان نوع تراك الموسيقي المستخدم في الفيديو زي مثلاً أغنية Astronaut The Ocean – What you Know About اتعمل منها كمية فيديوهات مش منطقية وكانت تريند كبير جداً.
• معلومات عن الشخص اللي نزل البوست: وهنا انستجرام بيقولوها صراحة كل الناس زي بعض وأي حد عنده فرصة أن المحتوى بتاعه ينتشر ويViral بسهولة طالما كويس والناس حبته.

وبرضه نفس الGuidlines اللي كانوا عاملينها في الExplore وزودوا عليها شوية حاجات زي ان لو الReel الكواليتي بتاعته ضعيفة أو محطوط عليه Watermark ودي عاملينها مخصوص عشان محدش يشير فيديوهات TikTok على الReels أو فيديوهات متعلقة بالسياسة.

طبعاً المقال كان فيه كلام تاني كتير بس دي أهم نقطة كانت مجهولة ومبهمة عند ناس كتير وكان من الضروري انستجرام يعلنوا عنها لأن الموضوع كان ولا الأسرار الحربية.

دلوقتي بعد ما عرفت كل ده، لو أنت صاحب بيزنس أو حتى شغال على حساب لعميل عندك إزاي هتعرف تستفيد من انستجرام عشان تطور الأكاونت أكتر؟

دول  5 خطوات لو نفذتهم هتلاقي الحساب بقى في مكان تاني خالص:

1. اهتم بالريلز:
   زي ما كنت بشرح خوارزمية الريلز فهي معتمدة بشكل رئيسي على الViral Content أياً كان شكله يعني مش لازم تعمل فيديو مصروف عليه ومعمول بشكل احترافي، السر في المحتوى فقط لا غيراهتم بجودة المحتوى بتاعك ويكون فعلاً مفيد للناس ويكون فيه 3 مكونات رئيسية معادلة اسمهاVAR Formulaودي عبارة عن ( بيقدم لهم قيمة Value – يجذب انتباههم Attention  – مناسب لجمهورك Relevant) طبق المعادلة وهتوصل لنتيجة صح.
2. العب في الستوريز:
   الستوريز هي أول حاجة بيروح ليها أي مستخدم في انستجرام قبل ما يبدأ يبص على البوستات وكمان بتخليك ظاهر ليه دايماً وموجود في وسط زحمة يومه، حاول تخلي محتوى الستوريز عبارة ع عن محتوى تفاعلي Engagement مش محتوي بتقوله فيه معلومة Informative لأن بشكل عام الناس في انستجرام داخله التطبيق تنبسط وتشوف حاجة مختلفة مش تنزلهم ستوري فيها صورة وخلاص لا استغل الPolls والGIF والEffects الموجودة جوة الستوريز وهتقدر تطلع منه أفكار حلوة وفي مقال حلو على موقع Conviva فيه شوية أفكار للستوريز.
3. حلل البيانات:
   تظبيط الشغل أهم من الشغل، أهو الكلام ده ينطبق بحذافيره على جزئية تحليل البيانات ودي الهدف منها انك دايماً تشوف أرقام الحساب ماشية إزاي يعني دايماً في محركات بتقولك أنت ماشي صح ولا غلط وهتحدد ده من خلال انك تحط KPI’s واضحة تحاسب نفسك عليها كل شهر أو 3 شهور،  زي الوصول Reach بتاعك في زيادة ولا ثابت وكمان مشاهدات الستوريز Story Views والReels Views ومعدل التفاعل Engagement Rate كويس ولا أقل من المتوسط وتقدر تعرف تقيس معدل التفاعل من أداة مجانية اسمها Engagement Rate Calculator من موقع Phlanx، بناء على تحليل أرقامك هتبقى عارف اتجاهم الفترة ماشي إزاي وتعرف ايه المحتوى اللي عجب جمهورك والمحتوى اللي محصلش عليه تفاعل فممكن تبعد عنه أو تطور منه أكتر وهكذا.
4. استمرارية في المحتوى: 
   مش معنى أنك نزلت محتوى على انستجرام فلازم أنه يبقى مسمع والناس تتفاعل عليه من أول مرة، الموضوع بيبقى محتاج انك تعمل خطة واضحة للمحتوى بتاعك ويكون مستمر وبينزل في وقت مستمر يعني متعملش زيي وتنزل مقالات وبوستات كل فترة ولكن حدد سواء أنت شغال بنفسك أو معاك فريلانسر ماسك الشغل أو شركة يبقى في مواعيد واضحة لنزول البوستات والمحتوى المختلف على الحساب ومينفعش الحساب يقف خالص حتى لو الأرقام ضعيفة في الأول وممكن تبقى محبطة جداً لكن طول ما أنت مكمل في شغل وبتطبق ال3 نقط اللي فوق فخليك متأكد أن عدد المتابعين هيزيد وتعرف تخلق علاقة بينك وبينهم وبالتالي مبيعاتك لو أنت بيزنس هتزيد أو لو أنت مجرد صاحب محتوى هتبقى انفلونسرز ومحدش هيعرف يكلمك تاني.
5. ظبط شكل الحساب:
   الخطوة دي زيادة الصراحة بس مؤخراً بقيت بشوفها مهمة وبتفرق على انستجرام تحديداً، اهتم بشكل الGrid وتكون حاطط تصور واضح أول ما الشخص يفتح حسابك هيلاقي شكله عامل إزاي يعني مثلا الناحية اليمين صور والنص فيديوهات والشمال صور أو ممكن ال3 صور بس كل عمود لنوع صور أو تصميمات معينة أو العمود اللي في النص بس هو المحتوى والناحيتين التانيين بيخدموا عليه وهكذا والمقال ده  على موقع Planable فيه شرح لطيف عن الموضوع.

لو طبقت ال5 خطوات البسيطة دي  من وجهة نظري هتقدر تغير شكل حسابك في حتة تانية خالص، وطول ما أنت فاهم خوارزمية انستجرام ماشية إزاي فهتقدر تستغلها لصالحك صح خصوصاً أن فعلاً الموضوع مش إعجاز علمي لكن محتاج شوية مجهود واستمرارية.

أخيراً هل شايف أنك لما عرفت إزاي خوارزمية انستجرام هتخليك تغير من خططك الحالية في حاجة؟