اعلن موقع تويتر امبارح في خطوة مفاجئة لكل مستخدمين مواقع السوشيال ميديا انه حيقفل تطببق “فاين” على الموبايلات وحيكتفي بوجود موقع التطبيق بس على النت.

الاول نعرف ايه هو فاين ؟

– هو تطبيق فيديوهات قصيرة مدتها مبتزيدش عن 6 ثواني ، التطبيق بدأ سنة 2012 وحقق نجاح مش طبيعي وكان السبب في ظهور ناس كتير مشاهير بقوا بيعملوا فيديوهات ولو اخدنا مثال قريب حيبقى للاسف المدعو شادي سرور اللي كانت بدايته من فاين.

– تويتراشترت فاين في اكتوبر 2012 ب30 مليون دولار وكان مدعوم ان فيديوهاته تظهر على التايم لاين على طول ويعتبر من نقاط قوة تويتر كان فاين، بس الغريب ان تويتر ماكنوش مهتمين اوي بدعم وتطوير فاين خالص والتطوير كان على نطاق بسيط جدا جدا جدا .

-في أغسطس 2015 كان عدد مستخدمين فاين النشطين 200 مليون مستخدم ، وعدد الفيدوهات اللي اترفعت لحد فبراير 2016 كان 39 مليون فيديو ، ارقام خرافية طبعا بالنسبة لموقع فيديوهات وكمان مدته صغيرة جداً.

-مواقع كتير اخدت فكرة الفيديوهات القصيرة من فاين زي انستجرام اللي طور فيها وخلاها توصل ل60 ثانية حالياُ

-امبارح 27 اكتوبر كانت الصدمة والاعلان عن قفل فاين والاكتفاء بالموقع .

-تويتر بتتخبط بقالها سنتين بسبب عدم التطوير المستمر فيها وده خلى عدد المتسخدمين النشطين يثبت وساعات يقل عن العدد المتوقع ، زيادة على كدة ان تطبيق زي انستجرام تخطاه في عدد المستخدمين ووصل ل500 مليون مستخدم في حين تويتر 317 مليون بس.

-تويتر الفترة الحالية عامل زي اللي بيغرق وبيطبش ومش عارف يعمل ايه فبيغرق اللي حواليه عشان يحاول هو يعيش، بييقلل في النفقات ويببيع شركات بالنسبة له مش مهمة وهكذا.

-في اول رد فعل لمؤسس التطبيق “روس يوسوبوف” كتب تويتة لطيفة مكتوب فيها ” ما تبيعش شركتك!” واضح جداً انه متضايق من القرار ومستغرب منه ، بالمناسبة هو تم الاستغناء عن خدماته من سنة تقريبا.

كل اللي فات ده كوم واللي جاي ده كوم تاني

موقع الفيديوهات الجنسية الشهير بورن هاب اعلن انهم بعتوا رسالة للمدير التنفيذي لتويتر جاك دوريسي طلبوا فيها انهم يشتروا فاين، ووعدوا انهم يرجعوا التطبيق لمجده وشايفين ان 6 ثواني كفاية

مصادر :

خبر بورن هاب : http://cnet.co/2eDS3zm

احصائيات فاين : http://bit.ly/2eVldsr

احصائية تويتر : http://cnet.co/2fnNzy0

احصائية انستجرام : http://bit.ly/2eVjjYR

تويتة مؤسس فاين : http://bit.ly/2eZS6Tl