-الكارثة أو فضيحة أناليتكا دي قلبت الدنيا على فيسبوك وسهمه في البورصة نزل أكتر من 9% وخسروا 50 مليار دولار ودي أرقام مخيفة، ده غير أن الحكومة البريطانية فتحت التحقيقات في الموضوع، والحكومة الأمريكية حتفتح تحقيق بخصوص تورط رئيس حملة دونالد ترامب الانتخابية وتحديداً مستشار ترامب ستيفن بينون اللي في نفس ذات الوقت كان نائب رئيس شركة اناليتكا.

-أغلب النقد الموجهة لفيسبوك أنهم كانوا عارفين مشكلة تسريب المعلومات دي من وقتها وكل اللي عملوه أنهم بعتوا تحذير رسمي لواحد من اللي كانوا شغالين في الشركة دي أنه لازم يحذف الداتا دي لأنها (من غير إذنهم) لكن فيسبوك أكتفى بالتحذير ده ومحاولوش ياخدوا خطوات جد زي فضح الشركة ويحذفوها من على فيسبوك زي ما عملوا بعد ما الموضوع أتعرف.

-الغريب أن كل اللي حصل ده من غير ما الـCEO مارك زوكيربرج أو الـCOO شيرل ساندبرج يتكلموا عن الموضوع تماماً وحتى الميتنج اللي حصل مع تيم فيسبوك يوضحوا فيه المشكلة كان بإدارة محامي الشركة، وأول تصريح رسمي من مارك كان من 4 أيام بالظبط في بوست على صفحته الشخصية حكى فيه الموضوع بالتفصيل وأعتذر وأعلن أنه مسئول عن أي مشكلة حصلت وأننا بنتعلم من غلطاتنا وكل الكلام الجميل ده وأنهم حيقللوا من قدرة المطورين على الوصول لداتا المستخدمين وكمان عمل انترفيو مع قناة CNN وبعديه بيوم شيرل طلعت في أكتر من قناة وشيرت بوست مارك مع الاعتراف أنهم مقدروش يتعاملوا كفيسبوك مع المشكلة بشكل صحيح.

-ردود الافعال على الفضيحة وصلت أن بريان أكتون الشريك المؤسس لواتساب واللي كان شغال مع فيسبوك لحد أواخر السنة اللي فاتت كتب تويتة أن ده الوقت علشان نمسح فيسبوك من موبايلتنا، وايلون ماسك واحد من أهم الشخصيات في عالم التكنولوجيا والمالك لشركة Tesla للعربيات الذاتية القيادة، وشركة SpaceX للأقمار الصناعية قرر يقفل صفحات الشركتين على فيسبوك وأتقفلوا بالفعل وشركات بدأت تقلل إعلاناتها على البلاتفورم.

-المرة دي أقوى تهديد حصل لعرش فيسبوك لأن كل اللي فات كان يا إما منافسين فهو بيقدر يقضي عليهم بكل الطرق المشروعة والغير مشروعة، يا إما سوء استخدام للإعلانات بيحصل عن طريق مستخدمين أو شركات وكان التبرير أنهم بيحاولوا يعملوا ليميت للموضوع ده.

-فيسبوك في كل الحالات طالع خسران من الموضوع، خسروا فلوس وخسروا سمعة وخسروا مستخدمين لأن التخوف والشك عند الناس في فيسبوك بقى كبير وهيبدأوا يتجهوا لمواقع بديلة خصوصاً في أمريكا اللي هي أساس نجاح فيسبوك من حيث الانتشار أو أرباح الإعلانات.

لك أن تتخيل الليلة دي كلها بسبب بني آدم معتوه أسمه دونالد ترامب وفريق إدارة حملته الإنتخابية!!.

*على الهامش:

مقال عظيم من كريم سمارة فيه شرح أكبر للموضوع: