كعادة فيسبوك يعني انه بياخد الحلو من هنا على الحلو من هنا ويضرب كوكتيل في الخلاط يعمل حاجة لنفسه بعد ما قدر يكسب معركته التنافسية ضد تويتر وانستجرام وسنابشات بطرق مختلفة ،المرة دي الدور جه على موقع لينكدان.
موقع التقنية الشهير Tech Crunch نزل خبر ان فيسبوك اضاف ميزة جديدة لصفحات الشركات بتخليهم يقدروا يعلنوا عن وظايف جديدة والناس تقدم للشركة مباشرة عن طريق فيسبوك ماسنجر.
الخاصية دي خلاص اتطبقت حالياً في أمريكا وكندا، وحتتنشر في بقية دول العالم خلال السنة دي وده حيكون شكل الTab :
http://bit.ly/2mTNFju
دلوقتى كل اللي حيحصل انه الشركة حتعلن عن وظيفة انت كشخص حتدوس على Apply Now حيفتحلك الماسنجر تدخل بياناتك زي ما في الصورة كدة : http://bit.ly/2nwovWo
في تحليل لتيك كرانش عن أسباب فيسبوك انه يزود ميزة زي دي عنده كان الكلام انه رغم وجود اكتر من 450 مليون شخص على موقع لينكدان اغلب الشغلانات المتوفرة عليه بتكون للشركات الكبيرة والمتوسطة وبتكون اكيد Full Time.
لكن فيسبوك عرف “من اين تؤكل الكتف” ولقى الشركات الصغيرة والناس اللي بتدور على اشغال Part Time او حتى شغلانات اليومية حيلاقوا فرصة من خلال الميزة دي.
اندرو بوز نائب رئيس قسم إدارة الإعلانات والتجارة في فيسبوك قال في تعليقه على الخبر ان الفيسبوك بيستهدف “يخلي حياة الناس اسهل” ويكون مفيد في حياتهم اليومية.

السؤال هنا: يا ترى الفيسبوك حيكسب المعركة كالعادة ولا لينكدان حيكون ليهم رد مختلف؟

المصدر:

http://tcrn.ch/2newHxd