جوجل بالنسبة لأي شخص في العالم المصدر الرئيسي للمعلومة من خلال محرك البحث الخاص بيها المتفوق على كل منافسيه، ده غير يوتيوب وأندرويد ولكن مشكلة جوجل الازلية مواقع التواصل الاجتماعي.

لو تتبعنا عدد مواقع التواصل اللي عملتها جوجل وفشلت هنلاقيهم حوالي 7 مواقع(

Google Buzz – Google Friend Connect- Dodgebal – Jaiku – Orkut – Hangout – Google Plus)

رقم كبير جدا وفي جزء منهم إحنا منعرفش عنهم حاجة زي جايكو ودودج بول مثلاً.

طب ليه جوجل عندها رغبة وسعي مستمر لعمل موقع تواصل أو حتى أنها تشتري مواقع موجودة بالفعل زي تويتر وسنابشات؟

بشكل عام أي شركة كبيرة بتسعى أنها تخلي الناس يستخدموا منتجاتها وخدماتها أطول وقت ممكن عشان تقدر تجمع داتا عنهم أكتر فبالتالي يكون في إعلانات موجهة صح أكتر فالنتيجة زيادة في الأرباح أكتر وأكتر وأكتر.، عشان كدة كلهم بيدوروا على حتة البازل الناقصة في شركتهم يزودوا بيها الأرباح.

مثال على كدة ميكروسوفت لما اشترت لينكدإن – بعتبره أنجح استحواذ حصل آخر 5 سنين والتاني بعد صفقة فيسبوك وانستجرام في آخر 10 سنين- وفيسبوك عرضوا يشتروا تويتر في 2010 تقريبا، فكل المواقع بتحاول تاخد حتة من التورتة عشان كدة جوجل حاولت تشتري سنابشات في 2016 لكن كالعادة العرض اترفض، ده حتى أبل حاولت تعمل بلاتفورم خاصة بيها كان Related بالموسيقى سموه ITunes Ping بس فشلت برضه وقفلوه في شهر 9 اللي فات.

طيب جوجل بتفشل ليه؟

انا الصراحة مفيش سبب معين اقدر اقوله لكن وجهة نظري إن ده مش المجال اللي بتفهم فيه جوجل َولكن دايماً خوفهم من فكرة سيطرة حد غيرهم على بيانات الناس بتزعجهم ودايماً عايزين ينافسوا فيسبوك وبيجروا وراهم وقبل انتشار فيسبوك مكنوش حاطين الموضوع في خطتهم الأساسية لأن لحد بداية الانتشار الكبير لفيسبوك في 2008 مكنش في بلاتفورم بالعة السوق وباين أنها خطر عليهم، لذلك حاجة زي Orkut أوBuzz كانوا شغالين كدة تقضية واجب مفيش شيء مميز فيهم.

الأهم بقى برضه من وجهة نظري ان الناس مش شايفة جوجل غير في السيرش مش عارفين يشوفوها في حاجة تانية غير كدة أيوة عندهم يوتيوب واندرويد بس مازالوا منفصلين وليهم هوية مختلفة عن جوجل نفسها وسبب فشل جوجل بلس الكبير كان ربطه بجوجل.

لما حد سأل نفس السؤال ده على موقع Quora وأكتر إجابة كانت الناس بتأيدها ومنهم ناس اشتغلت في جوجل كان فيها 4 تفسيرات:

1- جوجل عندهم ليميت في الUI (User Interface) شكل الموقع او التطبيق ومش بيسيبوا الديزاينرز يبدعوا ويطلعوا حاجة جذابة تشد الناس ومينفعش نغير حاجة قبل ما نعملها تيست، بمعنى أدق لو عملت شكل للUI النهاردة متقدرش تغيره بكرة بسهولة وتعدل عليه.

2- مؤسسي جوجل أصلاً مش ناس اجتماعيين، ومش من النوع اللي بيتواصلوا مع الناس بسهولة.

3- الاساس اللي اتبنت عليه جوجل كان البحث مش التواصل الاجتماعي فبالتالي هما مش ملمين ب Core السوشيال ميديا.

4- هما ميعرفوش ازاي يبنوا مجتمع لان حتى يوتيوب هما اشتروه ناجح وبعدها طوروا عليه وده اللي غالباً كانوا عايزين يعملوه في سنابشات لو كانوا اشتروه.

وتأكيداً للنقطة رقم 1 في ديزاينر اشتغل في جوجل بلس كتب تفاصيل كتير عن أسباب فشل بلس الذريع الكلام كتير جداً فهتلاقوه في المصادر.

هل جوجل حتستسلم؟

في يوليو 2019 أعلنت جوجل عن أجدد محاولتها لعمل موقع تواصل اجتماعي اسمه Shoelace وده فكرته قايمة على أن الناس اللي بتحضر ايفنت معين أو بتعمل حاجة معينة في وقت ما وعايزين الناس تشاركهم الموضوع يقدر يقول والله يا جماعة انا بلعب كورة في المكان الفلاني حد يجي معايا؟ وهكذا، الابلكيشن فكرته لطيفة وقايم على فكرة المشاركة وان الناس تقابل وتتعرف على بعض على الحقيقة مش العالم الافتراضي، وهو متاح حاليا في مدينة نيويورك بس.

لكن هل تنجح الفكرة وتعملها جوجل؟

اللي عمل البلاتفورم دي مجموعة موظفين في جوجل من خلال Area 120 ودي Incubator عاملاها جوجل بتسمح فيها لكل الموظفين يخصصوا 20٪ من وقت شغلهم داخل الشركة عشان يشتغلوا على مشاريعهم الخاصة ويبدعوا براحتهم، فرغم دعم جوجل للموضوع فهو مش تحت ادارتها بشكل كامل واللي عاملينه ليهم الحرية في تطويره اختيار شكله وطريقته وهكذا وفي نفس الوقت جوجل حاليا مش مستعجلين يعملوا بلاتفورم جديدة فبالتالي Shoelace ممكن مع الوقت ينجح ويكبر وياخد مكانته وسط العمالقة.

اخيرا تفتكروا جوجل هتقدر في يوم من الايام تبقى رقم 1 في السوشيال ميديا كمان ولا صعب يحصل؟ مستني رأيكم في الكومنتات.