هل حالة الجو بتفرق في قرارك انك تتفاعل مع بوست على السوشيال ميديا؟
خلال تحضيري لمقال الأسبوع كنت محتار بين أكتر من فكرة وكعادة أي شخص لما يكون قدامه اختيارات كتير مبيختارش حاجة أصلاً فكتبت المقال ده يوم 3 نوفمبر ولسة منزله النهاردة.
المهم يعني وأنا بشوف بوست على جروب Riseup Connect لحد بيسأل هل في حد حاسس بوجود مشكلة في التفاعل على إعلانات فيسبوك وانستجرام خلال الفترة الاخيرة ولا لا فكان في إجماع عند معظم الناس إن اه في يومي التلات والاربع الدنيا فيهم كانت مريحة جداً لفت نظري كومنت أستاذ أحمد جلال مؤسس موقع taskty.com من واقع خبرته في المجال إن فعلاً مع أي شوية شتا أو مظاهرة أو مشكلة حصلت في البلد فالناس بتقل رغبتها في الشراء وبيكونوا مش في مود مناسب يهتموا فيه بالحاجات اللي عايزينها.
في نفس اليوم قابلت واحد صاحبي وكنا مشغلين أغاني فرفوشة كدة قالنا لا شغلوا لي أغاني كئيبة بتاعة الشتا، كل ده مع تجاربي من خلال شغلي خلال ال3 سنين اللي فاتوا عن معاناتنا خلال الفترة من نص شهر اكتوبر-الخريف والشتا- لحد بداية شهر 3 -بداية الربيع- مع تخبط العملا والTurn Over العالي.
كل ده خلاني افكر هل فعلا التسويق والبيع مرتبط بمواسم السنة الأربعة ولا الموضوع حالات فردية.
لما بدات ادور في الموضوع لقيت نتايج مبهرة الصراحة، على عكس المتوقع لقيت ان الناس بتتفاعل اكتر في الخريف والشتا على السوشيال ميديا لكن حركة البيع بتبقى اقل بكتير وده المتوقع.
حسب موقع Fanpagekarma في دراسة سابقة ليهم التفاعل بيزيد بنسبة 42% في الأيام اللي فيها شتا وكمان البوستات اللي فيها سلبية وكئيبة بتزيد في الفترة، والناس بيتفاعلوا مع البوستات اللي رسالتها سلبية زي الخوف والزعل وهكذا.
بالنسبة للمسوقين ففرصتك علشان تزود التفاعل على المحتوى بتاعك ممكن يزيد ل89% لو عرفت تربطته بحالة الجو ومن خلال مقال بحثي لقوا إن في وقت السقعة والشتا الناس بتبقى مستنية عروض وخصومات خصوصا لو في الأكل يعني لو مطعم عمل توصيل مجاني في أيام الشتا حيكسب تفاعل كبير وكمان زيادة في المبيعات.
الملخص إن الاحصائيات الأجنبية بتقول عكس اللي إحنا شايفينه هنا خصوصاً إن اغلب الدراسات دي أوروبية وأمريكية وأعتقد ده راجع لاختلاف الثقافات وطبيعة الحياة بين المواطنين هنا وبرة.
من رأيك كمستخدم عادي هل فعلاً اختلاف مواسم السنة بيفرق معاك في طريقة تفاعلك على السوشيال ميديا ولا لا؟