مشكلة كبيرة بتواجه اي حد شغال في مجال السوشيال ميديا وتحديداً على فيسبوك وهي نسبة الtext على الديزاين، ياما حصلت خناقات بين الديزاينر والماركتير على ديزاين معين عشان كل شوية فيسبوك يرفض الإعلان ويضطر الماركتير يرجع للديزاينر يقوله معلش عدل الديزاينر وصغر الكلام شوية.

قبل العركة دي لازم نعرف ايه هو Text Overlay؟

بعد ما المسوقين بدأوا يستخدموا الفيسبوك كمنصة رئيسية للإعلان عن منتجاتهم بدأ ناس تكتب قصة حياتها على الصورة اللي بتعمل بيها اعلان لذلك فيسبوك ولأنهم من احسن الناس اللي بتهتم بالuser experience لقوا ان الناس بتضايق لما تشوف كلام كتير على اي صورة او ديزاين قرروا أن نسبة الكتابة متزيدش عن 20% من اي ديزاين ولو مفيش كتابة يكون احسن.

الموضوع ده كان ماشي بيه الفيسبوك لحد أبريل من 2016 اعلنوا انهم غيروا الطريقة بدل 20% حتبقى 4 مستويات (OK-Low-Medium-High) بمعنى أكثر توضيحاً فيسبوك مش حيرفضلك اعلان الا لو كان فعلاً كله كلام غير كدة حيوافق على الاعلان بس لو كان Ok فكدة هو حيوصل للpaid reach المتوقع لكن لو كان low فكدة حيقلل عدد الناس اللي حتشوف اعلانك بس ولو medium حيقلل العدد اكتر ولو high فانت كدة الاعلان بتاعك حيتوقف من الفيسبوك.

-دي صورة بتوضح الموضوع اكتر:

-من الاخر فيسبوك قالك اعمل اللي انت عايزه واحنا حنعمل اللي عايزينه وحناخد منك فلوس اكتر 😀 .

-طيب ايه هي الحاجات اللي بتتحسب كText؟

اللوجوهات- العلامات المائية- الارقام.

-هل في استثناءات ؟

اه في لبوسترات الافلام او أغلفة الكتب وعلب لمنتجات أياً كان نوعها مع شرط رئيسي أن صور الحاجات دي تكون مبينة المنتج كله مش قاطع جزء معين وهكذا، بشكل عام الفيسبوك بيدقق على حاجات كتير في موضوع الاعلانات ده مش الtext بس.

-طيب هل في حل لمشكلة الtext دي؟

-الفيسبوك كتر خيرهم عملوا tool لطيفة كدة ترفع عليها الديزاين بتاعك وهو يقيمه بمستوى من ال4 وده اللينك بتاعها : http://bit.ly/2pJ4TPf

-كل واحد يخلي باله وهو بيعمل اعلان عشان ميدفعش فلوس كتير في اعلان ويلاقي الreach قليل ومستغرب من كدة، ساعتها فعلاً الText حيعضك في الفلوس وحتزعل اوي 😀

-اعرف اكتر عن الText Overlay من هنا : http://bit.ly/2oDL0cY