موقع صراحة واجه حملة هجوم كبيرة جداً خلال الأسبوع ده بسبب اتهامات بانتهاك خصوصية مستخدمينه.
-إزاي ده حصل؟
في شخص أسمه زاكاري جوليان وده محلل أمن إنترنت أكتشف أن صراحة بيرفعوا كل الContact list اللي عندك على الموبايل للسيرفرات عندهم، الراجل راح عمل فيديو بيثبت حوار نقل البيانات ده.
صراحة ومؤسسها زين العابدين توفيق كانوا ملتزمين الصمت لحد ما الموضوع انتشر والمواقع بدأت تتكلم عنه فالراجل بدأ يوضح أنهم واخدين access للأرقام عشان ناويين يفعلوا خاصية تدور على صحابك.
-طب ما كل المواقع بتعمل كدة اشمعنى صراحة يعني بيتهاجم؟
لأنه الموقع موضحش ده في سياسة الخصوصية والأهم أنه فعلياً لسة الخاصية متفعلتش فأنت بتستخدم أرقام التليفونات دي على أنه أساس؟
-موقع صراحة نفسه نزل بيان رسمي إمبارح أكد فيه أنه مش بيحتفظ بالأرقام والداتا في السيرفرات وأنهم طبعاً يهمهم مستخدميهم والكلام المعتاد ده.
شوية أرقام كدة نفهم بيها ليه صراحة بقى موقع ليه تقله ولازم يتحط في الحسبان:
– 18 مليون مستخدم في خلال حوالي 6 شهور بس وبعد ما الموقع نزل الابلكيشن على أندرويد وIOS زاد عدد المستخدمين بصورة كبيرة خصوصاً الدول العربية وأمريكا والهند.
-مصدر قوة الموقع في الجيل الصغير خصوصاً بعد ما الموقع أتاح لمستخدمينه يربطوا أكاونت صراحة بسنابشات.
-التطبيق محتل المراكز الأولى في بلاي ستور وأب ستور من شهر 7 ومعموله داونلود في أكتر من 30 دولة.
-300 مليون رسالة اتبعتوا من خلال صراحة، مع العلم أن مؤسس الموقع كان هدفه يوصل ل1000 رسالة بس في الأول 
?.
-مليار مشاهدة لصفحات صراحة، رقم خرافي وكبير على موقع بسيط زي ده.
بشكل عام الموقع مبقاش مجرد فكرة من شاب عربي ومستخدمينه كلهم عرب وزيتنا في دقيقنا والليلة دي لا الموقع بيتوسع بغباء ولازم يخلوا بالهم من الهفوات اللي ممكن تسبب كوارث ويفقدوا ثقة الناس فيهم.
P.S:
أنا مش شايف في نوع الplatfoms زي صراحة وأسك أف أم وغيرهم فيهم “مشكلة أخلاقية” زي ما الناس بتقول، الإنترنت بشكل عام عالم مفتوح فيه كل الناس والانواع والأشكال وأنت اللي بتختار وتتحمل نتيجة اختياراتك.
في الأخر يسعدنا استقبال أسئلتكم واستفساراتكم على الرابط التالي 
?:
SafyEldin.Sarahah.com
