*تنويه:
المقال طويل شويتين بس على ضمانتي يستاهل 
.
.25 يوليو 2018 الساعة 4 مساءاً:
إنهيار بقيمة 20% لأسهم فيسبوك بعد الإعلان عن نتايج الربع التاني من 2018، واللي كانت من وجهة نظر المحللين والمستثمرين مخيبة للتوقعات.
ليه حصل كدة؟
-أول وأهم حاجة كان فضيحة كامبريدج ومشكلة التجسس على المستخدمين، تفاصيلها تقدروا تعرفوها من هنا:
الموضوع ده خالق حاجز وعدم ثقة بين الناس وفيسبوك.
– ده يخلينا نوصل للسبب التاني ألا وهو وجود أقل معدل زيادة في مستخدمي العملاق الأزرق شهرياً بزيادة 1.54% بس والمعدل اليومي زيادة 1.44% مقارنة ب3.14% في الربع الأول من السنة.
– السبب التالت وهو اللي من وجه نظري كارثي لأول مرة يحصل انخفاض في عدد المستخدمين في أوروبا شهرياً من 377 مليون مستخدم ل376، وفي أمريكا فضل عدد المستخدمين ثابت 241 مليون شخص، الفرق مليون فرد بس لكن ده مؤشر خطر وجرس إنذار إن القادم أسوء.
– ليه كارثي؟
في نفس تقرير يوم 26 ده كان في رقم مهم كدة إن المكسب اللي بياخده فيسبوك من المستخدم الواحد كان في أمريكا 25.9 دولار، وفي أوروبا 8.76 دولار وفي آسيا 2.62 دولار وبقية دول العالم 1.9 دولار، يعني تقريباً أكتر من 88% من عوائد فيسبوك معتمدة على أمريكا وأوروبا، فنزول عدد المستخدمين ده بيوصلنا لنتيجة حتمية بأن الأرباح حتقل.
– مع الوضع في الحسبان أن في نفس الفترة المشئومة دي وصلت أرباح فيسبوك من الإعلانات ل 13 مليار دولار بزيادة 42% عن السنة اللي فاتت، رقم خرافي وخيالي ويدعو للتفاؤل بس من وجهة نظري خادع جداً وده لأن مع بداية التغييرات اللي حصلت في Facebook Algorithm في فبراير اللي فات حصل زيادة لتكلفة الإعلانات 77% وخلال 2017 ل2018 زادت تكلفة الإعلانات بشكل عام 122% أرقام برضه كبيرة وصعبة الإدراك وبتبين معاناة أي حد شغال في المجال، فده يوضح إن لو فيسبوك مقدرش يكسب ثقة الناس تاني خلال الفترة الجاية حيحصل نزول أكبر في أعداد المستخدمين، والمعلنين ممكن يبدأوا يدوروا على طرق بديلة واقل تكلفة لنشر إعلاناتهم.
– خلينا نبص على الناحية التانية إن فيسبوك بقوا مهتمين جداً بحتة ال Transparency او الشفافية، بعد ما عملوا تحديث لكل الصفحات تقدر تعرف عن طريقة الصفحة دي اسمها اتغير ولا لا وايه الإعلانات اللي هي بتعملها وفي أنه مكان ده غير محاولاتهم المتكررة للتضييق على الTargeting في الإعلانات وإن المحتوى هو يبقى الحكم ويخلي الناس تنجذب لشغلك.
– السؤال الأهم اللي مش لاقي له إجابة مؤكدة وممكن تشاركوني برأيكم، هل الخطوات اللي عملها فيسبوك دي حتبقى كافية أنه يرجع تاني مصدر ثقة ولا الموضوع بقى أصعب من أنهم يقدروا يجاروه؟
