الفترة اللي فاتت ظهر كوميكس كتير عن تريند ظهر على تطبيق الرسائل تيلجرام بسبب خاصية ال Nearby Chat ودي ببساطة بتخليك تعمل شات مع اي شخص جنبك فاتح الخاصية دي عنده من غير ما تكون محتاج لرقم تليفونه او أي معلومات تانية.

طبعاً الكوميكس كلها كانت رايحة في سكة الشقط وانا السواق ليا عندك 2 جنيه وخلافه هتلاقوا صور ليها في المصادر والموضوع كان ظريف ولطيف ويضحك ولكن، هل الموضوع مقتصر بس على فكرة اني اشات مع الناس اللي حواليا وخلاص،  ولا ممكن لو أنا شخص عندي بيزنس أستغل الميزة دي في تيلجرام عشان أزود مبيعاتي بأقل تكاليف ممكنة؟.

خلينا الأول نقول أن تيلجرام واحد من أحسن التطبيقات اللي بحب أستخدمها واكتسب شعبية كبيرة جداً في مصر السنة دي والبداية كانت مع مسلسلات رمضان اللي كانت كلها بتنزل عليه أول ما الحلقة تنزل بأعلى كواليتي وكمان في وقت امتحانات الكليات كان الطلاب كلهم بيغشوا إجابات الأسئلة من خلاله برضه وأكاد أجزم إن ما يزيد عن 70% من الأرقام اللي عندي بقى عندهم أكاونت على تيلجرام.

هتكلم عن مميزات تليجرام وقصته بالتفصيل في أول مقال من سلسة مقالات اسمها #حرافيش_السوشيال_ميديا بتتكلم عن مجموعة مواقع تواصل اجتماعي ملهاش شعبية كبيرة بس مفيدة بشكل عظيم ومحتاج يكون ليك أكاونت عندهم.

ممكن تعرف رأيي بشكل مختصرعن تيلجرام ومميزاته من خلال ردي على سؤال في موقع كيورا – Quora وده ليه حكاية تانية من الحرافيش تقدروا تشوفوا الرد في المصادر.

الغريب بقى في الموضوع أن ميزة Nearby دي موجودة من يونيو 2019 في الابلكيشن مش جديدة يعني بس احنا في مصر اكتشفناها متأخر ولولا الكوميكس مكنش حد أكتشفها ولا عرف عنها أي حاجة، الخاصية دي بتقولك مين الناس اللي في المحيط بتاعك وتقدر تكلمهم على طول كل ده حلو بس أنا كصاحب بيزنس او محل استفيد منها للتسويق لمنتجاتي وخدماتي في 4 خطوات بسيطة؟

بص يا سيدي أو يا ستي:

الخطوة الأولى: 

1- هتروح تفتح/ي تيلجرام 

2- هتدوس/ي على Contacts

3- هتختار/ي Find People Nearby

4- هتلاقي ناس عادية وكمان جروبات ممكن تكريت جروبك من خلالCreate A Local Group

الفيديو ده بيوضحلك الطريقة بالتفصيل:

الخطوة التانية:

أول رسالة على الجروب تبقى تعريف بالبيزنس بتاعك وأهم الخدمات أو المنتجات اللي بتقدمها وتعمل Pin للرسالة دي بحيث أي شخص يخش الجروب يبقى عارف أنت بتقدم أيه بالظبط وكمان عنوان الجروب يبقى واضح وبسيط.

الخطوة التالتة: 

نزل دايماً عروض او منتجات حصرية على الجروب وتبين للناس انك مهتم بيهم هما بالذات بعيداً عن أي موقع تواصل تاني بتقدم فيه خدماتك. 

الخطوة الرابعة:
اعمل مسابقات بين أعضاء الجروب ويكون الهدف منها يضيفوا جيرانهم من المنطقة على الجروب عشان تزود العدد واديلهم منتج أو خدمة مجانية.

لو عملت ال4 خطوات دول هتقدر تستفيد من ميزة Nearby وتزود مبيعاتك مع شرط الاستمرارية في تنزيل محتوى على الجروب  يخلي الناس متابعها وعايزة تفضل تستقبل رسايل منه بشكل مستمر.

النوع ده من التسويق بنسميه Local Marketing – التسويق المحلي وهبقى اتكلم عنه بالتفصيل في مقال منفصل خلال الفترة الجاية.

في الختام من وجهة نظرك هل التسويق من خلال الجروبات على تيلجرام أو فيسبوك أو واتساب طريقة ناجحة ولا مزعجة؟ ولو في نماذج ناجحة ممكن تذكرها في الكومنتات.

المصادر:

الكوميكس: 

http://bit.ly/SMTelegram1

http://bit.ly/SMTelegram2

http://bit.ly/SMTelegram3

مميزات كيورا:

http://bit.ly/SMTelelgram4

خبر تيلجرام عن ميزة الLocal Groups:

http://bit.ly/SMTelegram5

#سوشيال_مينيا