في كل سنة في الفترة دي بيبدأ كل المسوقين يجهزوا لخطة تسويق شهر رمضان وبيدوروا على مصادر يستعينوا بيها لشغلهم، السنة اللي فاتت كنت كتبت مقال بخصوص خطة التسويق في مرحلة الكورونا، لكن سنة 2022 بتشهد تقلبات اقتصادية كبيرة في كل دول العالم ونسب تضخم بتزيد وأسعار بتغلى وليلة كبيرة يعني، ده بيتسبب بشكل تلقائي أن الناس تقلل من مصاريفها وأنت كمسوق بتدور على حلول عشان تعمل خطة مناسبة للظروف الصعبة دي، لإن الموضوع فعلا صعب ولسة هيبقى أصعب.

جوجل نزلت تقرير لطيف فيه مجموعة إحصائيات وارقام مهمة عن سلوك وتعامل المستخدمين خلال رمضان، كل التقرير بالنسبة لي مكنش فيه حاجة جديدة أوي ما عدا رقم واحد بس شدني واستغربته وخلاني أرجع اكتب بعد مدة طويلة اوي.

الحاجة دي أن 57٪ من المستخدمين في مصر والسعودية والإمارات بقوا من فريق (السعر أولاً) وأهم دافع للشرا بيفرق معاهم هو سعر المنتج او الخدمة أهم من أي حاجة تانية و66% منهم قالوا سبب اهتمامهم بنقطة السعر أنهم عايزين يحوشوا ويحافظوا على فلوسهم ويقللوا في المصاريف.

النسبة دي لو كانت في مصر بس كنت هتبقى متوقعة وده شيء أساسي كل المسوقين وأصحاب الأعمال بيركزوا عليه فعلاً ولكن المفاجأة ليا كانت في انضمام السعودية والامارات لفريق السعر، لأن المتعارف عليه أنهم من فريق الجودة أولاً ولكن من الطبيعي مع المشاكل الاقتصادية وزيادة الأسعار بقى في حالة خوف شديدة عند الناس وعدم يقين من المستقبل.

يعني وانت بتجهز خطة رمضان – اللي المفروض تكون جهزت خلاص – تركز أنك تطمن الناس وتعرفهم ان الحاجة اللي بيشتروها منك تستاهل الفلوس اللي بيدفعوها، وكمان تجهز خطة التعامل مع غضب الناس من زيادات الأسعار المؤكد حصولها في رمضان وما بعد رمضان بشكل متزايد.

نقاط تانية أساسية وسريعة في شغل رمضان: 

1- اهتم بوجودك في محتوى الفيديوهات: 

رغم زحمة الإعلانات في كل رمضان لكن شئنا أم أبينا انت مطالب بالتواجد حتى ولو مش بكثافة كبيرة، فبالتالي لازم تعمل إعلانات سواء على يوتيوب – 75% من أكتر الفيديوهات مشاهدة خلال شهر رمضان 2021 كانت فيديوهات – أو طبعاً فيسبوك وانستجرام ولو البراند مهتم بالشباب وتحديداً المراهقين لحد سن 17 سنة فوجودك على تيكتوك مش رفاهية – 74% من مستخدمي تيكتوك بيستخدموا التطبيق عشان يدوروا على عروض أحسن في رمضان-.

2- بيع لرمضان قبل رمضان: 

تعرف أن 83% من الناس بتشتري حاجتها لشهر رمضان قبلها بأسبوع وفي ناس كمان بتحب تشتري قبلها ب3 أسابيع على الأقل، لو أنت مكان بيبيع منتجات ليها علاقة برمضان فالمفروض تكون بدأت من دلوقتي بيع والزباين بدأو يشتروا ويجهزوا لشهر رمضان.

3- اهتم بالمؤثرين – الانفلوسرز – الصح 

التسويق بالمؤثرين من أهم العوامل المحفزة للناس علشان تختار منتجاتك أو حتى يخلوا الناس تعرف عن البراند بشكل أكتر خصوصاً لما تعرف أن 61% من المشتركين على قنوات يوتيوب لصناع محتوى عرب أتأثروا أو اشتروا من براند بسبب أن صانع محتوى اتكلم عنهم في فيديوهاته، ونصيحة على السريع خصوصاً لو ميزانيتك التسويقية مش كبيرة اهتم أنك تشتغل مع انفلونسرز وصانعي محتوى صغيرين ولكن بعدد كبير أحسن ما تشتغل مع ناس عندهم متابعين كتير لكن مش هيدولك ولا نفس التأثير ولا الاهتمام اللي انت متوقعه، وعن تجربة الMirco و الMacro  من الInfluencers ليهم تأثير مستقبلي عظيم على البراند بتاعك.

4- اعرف أنواع جمهورك 

زي ما انت أكيد عارف جمهورك كله مش زي بعضه وليهم اهتمامات وتوجهات مختلفة عشان كدة جوجل عمل مقال لطيف جداً فيه شرح ل7 أنواع من الشخصيات اللي هتقابلهم في رمضان هتلاقوه هنا

شهر رمضان من أصعب الشهور اللي بتواجه المسوقين بسبب حجم المنافسة الشرسة، اللي هيكسب فيه هو اللي يوصل رسالة وقصة البراند بتاعه بطريقة صادقة وبسيطة تمس اهتمامات وشعور الفئة اللي بيستهدفها.

أخيراً توقعاتكم لشهر رمضان 2022 أيه، هل الازمة الاقتصادية العالمية هتأثر على قدرة الناس على الشراء ولا رمضان غير؟ 

لو محتاج أي استفسار عن أي شيء يتعلق بالسوشيال ميديا متترددش تبعتلي من خلال اللينك ده.