**ملحوظة اولية : المقال طويل شوية بس اعتقد انك لو قريته مش حتحس انك ضيعت وقت عالفاضي 
^_^
كان بقالي مدة عايز اكتب حاجة عن المواقع الي بتيح ليك ميزة انك تسأل شخص ما او براند وهو يرد عليك وكان اقرب موقع اقدر اخده كمثال واضح كان ask.fm.
لكن قبل ما احكي قصة ask حابب استبعد موقع quora من التصنيف ده اللي رغم ان فكرته مشابه بشكل كبير لask وتقريباً طلع الموقعين في نفس السنة ونفس الشهر بس هو بيميل للاتجاه الاكاديمي اكتر من المواقع اللي في نفس تصنيف ، وملحوظة جانبية لازم تعمل/ي اكاونت على qoura لانه كمية الاستفادة والمعلومات اللي فيه خرافية وليه مقال عما قريب.
المهم نبدأ حدوتنا عن ask.fm في يونيو سنة 2010 عن طريق الاخوين اليا ومارك تيريبن ، شخصيين من لاتفيا عاديين جداً قرروا يعملوا موقع منافس لموقع اسمه formspring واسمه حالياً spring.me فكرته قايمة على ان الناس تسأل بعضها وفعلاً انتشر الموقع بشكل كبير جداً بين الناس وبين المراهقين تحديداً من عمر 13 ل17 سنة اللي بيمثلوا نسبة اكتر من 50% من الموقع.
الميزة الرئيسية للموقع انه بيتيح ليك تسأل اي شخص عنده حساب على الموقع بطريقة مجهولة الهوية،هي دي نقطة قوة الموقع ونقطة ضعفه الكارثية في نفس الوقت.
بدأ الموقع يواجه الانتقادات الكتير من اول سنة 2013 وتحديداً في شهر اغسطس لما بنت بريطانية اسمها هانا عندها 14 سنة بس تنتحر بسبب انه في حد كان بيضايقها وبيبعتلها اسئلة مجهولة على موقع ask.fm والموقع مكنش بيهتم اوي بريبورتات المستخدمين ضد الناس اللي بتضايقهم لدرجة انه رئيس وزراء بريطانيا وقتها ديفيد كاميرون طلع انتقد الموقع بطريقة غير مباشرة وقال ان المواقع على الانترنت محتاجين ياخدوا خطوات جادة في متابعة مستخدمين مواقعهم ويتدخلوا انهم يمنعوا اي اساءات ليهم، بالفعل بعد الحادثة دي باقل من اسبوعين اعلن ask.fm انهم حيتابعوا الريبورتات اللي بتتبعت لهم على مدار ال244 ساعة وحيحلوها في اسرع وقت ووضحوا ازاي اي شخص يعمل ريبورت لسؤال مضايقه، لكن وبعد حادثة هانا بشهر واحد بس بنت اسمها سيارا من ايرلندا عندها 15سنة انتحرت برضه بسبب رسائل مسيئة ليها على الموقع وبدأ التخوف الكبير من اولياء الامور على اولادهم وبدأوا يمنعوهم من استخدام الموقع وده اضطر الموقع اللي كان بيواجه شبح الانهيار حرفياً يوجه اغلب اهتمامه في اتجاه نصح المراهقين واولياء امورهم ازاي يستخدموا الموقع وازاي يتصرفوا في حالة وصول اي اسئلة تهديد ليهم رغم كل ده في حوالي 9 حالات انتحار لمراهقين ارتبطت بشكل مباشر باستخدامهم لask.fm.
الموقع اتباع لموقع تاني اسمه ask.com في اغسطس 2014 اللي غيروا من شكل الموقع بشكل كبير جداً وركزوا على موضوع المشاركة المجتمعية وتوجيه النصائح للمراهقين واي حد فتح بلوج ask.fm حيلاقي 700% او اكتر بيتكلم عن الموضوع ده، وقلت فعلاً حدة الانتقادات للموقع وزاد عدد المستخدمين ليه بطريقة ملحوظة.
في مقابلة لمجلة التايم مع الاخوين تيريبين كانوا مضايقين جداً من الهجوم اللي شايفينه غير مبرر وغير مفهوم من وجهة نظرهم على الموقع وشايفين انه الموضوع كله ان الناس عايز اي حاجة تحملها المسئولية وكان الموقع هو الضحية، المقابلة بتاعتهم رائعة حتلاقوها في المصادر تحت.
بعد ما عرفنا حدوتة askk حعرض مجموعة ارقام عن الموقع :
-عدد مستخدمين الموقع الدائمين بحوالي 150 مليون مستخدم.
-معدل الزيارات اليومية للموقع خلال اخر 6 شهور حوالي 122 مليون زيارة.
-اكبر عدد مستخدمين للموقع من روسيا بنسبة حوالي 21%.
-مصر بتحتل المركز ال16في عدد المستخدمين والقاهرة بتحتل المركز ال100 من اكتر دول العالم استخداماُ ليه.
-في شهر يناير مصر كانت من اعلى 5 بلاد زيارة للموقع.
– في اكتر من 200 الف سؤال بيتسألوا على الموقع كل دقيقة.
الغريب انه وجهة نظري انه حتى الان مفيش اي براند او شركة كبيرة عندها اكاونت على الموقع او حتى حد فكر يعملها، واعتقد ده بنسبة كبيرة راجع انهم بيستبعدوا اي شبه او انتقاد يوجه ليهم من الاعلام انهم بيأيدوا الموقع او موافقين على فكرته الرئيسية الاسئلة مجهولة الهوية ،غير انه فيسبوك وتويتر ومواقع البراندات دي مخلياهم مش محتاجين لاستخدام الموقع كجزء رئيسي من خطتهم التسويقية.
نهاية، رأيي الشخصي انه مواقع الاسئلة سواء ask.fm او curious cat او حتى موقع صراحة (النسخة العربية المتطورة من ask.fm) اللي لسة فاتح من فترة قريبة من احسن الحاجات اللي حصلت على السوشيال ميديا لانه في ناس كتير (بتتكسف) او معندهاش الجرأة الكافية انها تسأل سؤال وهي معروف هويتها الحقيقة حتى لو كان ده من ورا كيبورد وشاشة، المواقع دي كان ممكن نتهمها بانها خطر لو كانت مش مديالك كمستخدم حرية الاختيار بين انك ترضى تستقبل الاسئلة المجهولة دي ولا لا ، ده غير ان العالم مليان مرضى نفسيين حيحالوا يتحرشوا بيك لفظياًً باي طريقة سواء بطريقة مجهولة او انه يعمل اكاونت مزور او غيره.
السؤال هنا هل انت كشخص بتعتبر ask.fm واخواته من مواقع السوشيال ميديا؟ سواء الاجابة نعم اولا لا ، ليه بقى ؟ وهل فعلاً هو خطر على الناس ولا شايف ان الموضوع مبالغ فيه؟
المصادر:
تاريخ الموقع : http://bit.ly/2lCVveM
حالة انتحار هانا وتصريح ديفيد كاميرون: http://bbc.in/2kFbyud
حالات الانتحار ال9: http://read.bi/2l5Tf1E
مقابلة مجلة التايم مع الاخوين تيريبين : http://ti.me/2l5HhoO
احصائيات وارقام عن الموقع: http://bit.ly/2kifkpX ، http://bit.ly/2kigGB1 ،http://bit.ly/2kUCkxd ، http://bit.ly/2lBtgw2
تقدروا تسألوا او تستفسروا عن اي حاجة بخصوص المقال او السوشيال ميديا او اي شيء عموماً من خلال:
https://ask.fm/FeldMrshalAsem
https://curiouscat.me/SafyEldin93
http://safyeldin.sarahah.com/
**لو عجبك المقال شير ولايك يا اخوانا 
