أعلنت جوجل عن تحديث جديد في محرك البحث بتاعها أنك دلوقتي هتقدر تشوف فيديوهات انستجرام وتيك توك من خلال نسخة الموبايل ويب على طول من غير ما تبقى محتاج تنزل اي ابلكيشن من الاتنين.
الموضوع ببساطة ان جوجل عملت Tab جديدة اسمها Short Videos – نفس فكرة الستوريز كدة – ودي عاملينها من مدة لكن كانت بتعرض فيديوهات قصيرة – بالطول – من يوتيوب ومواقع فيديوهات تانية لكن دلوقتي ضافوا عليهم انستجرام وتيكتوك. لما موقع TechCrunch سألوا مصدر داخل جوجل قالولهم انه الأبديت ده تجربة محدودة ولسة مش عارفين هيبقى بشكل دائم ولا لا.
وده شكل الأبديت الجديد
السؤال المهم هل ده تحديث عادي ولا جوجل عاملاه غصب عنها؟
نقدر نقول ان جوجل ماشية بمبدأ البحر يحب الزيادة وهما شايفين الاستخدام الكبير من جميع المستخدمين وتحديداً الجيل الجديد لتيكتوك وانستجرام بشكل مرعب مع حوالي 11 مليون مستخدم مصري بشكل شهري على انستجرام حسب احصائيات يناير 2020 ومؤكد أن العدد بقى أكتر من كدة بكتير وللأسف مقدرتش أوصل لمصادر عن عدد مستخدمين تيكتوك في مصر خالص فممكن، في نفس الوقت جوجل عايزين الناس دي تفضل جوة السيرش متخرجش منه على أي ابلكيشن غير تابع ليهم خصوصاً لما تعرف ان جيل الألفية في 51٪ منهم بيفتح التطبيقات اللي بيستخدموها أكتر من 20 مرة في اليوم بشكل متكرر وده رقم كبير.
في النهاية هل تتوقع جوجل تعرف تعمل موقع تواصل اجتماعي ناجح يوما ما ولا هتفضل فاشلة؟
تقدر تراجع مقالة ليه جوجل بتفشل على السوشيال ميديا عشان تعرف أسباب الفشل المرير لجوجل.
#سوشيال_مينيا
